In Zukunft werd jetz olles anders

Gehts weida, kemmts zuawa vo‘ überoi umanand:

s‘Wosser kimmt (!) -  steht scho am Kellerschachtrand!

Nimmer lang, na‘ bist waschlnaß bis auf d’Haut.

Wenn dir jetz‘irgendebbs nu‘ wos wert is - oder heilig,

nacha ruaderst und schwimmst, sunst saufst o‘ wia(r)a Stoa,

wei‘ in Zukunft werd jetz olles anders!

Du Groußbrachter, Kritiker, Skandaljournalist,

schaug oafach guat hi‘, dass’d as ja net vergißt!

Überleg dir, was’d schreibst, wei‘ no‘ geht‘s auf und dahi‘!

Koa Sieger is da lang no net ausgmacht!

Aber gwinna auf d‘Letzt wern de Verlierer vo‘ heit,

wei‘ in Zukunft werd jetz olles anders!

Du Machtiger, Wichtiger, horch genau hi‘,

gschaftlst eh grad umanand und blockierst de Partie!

Jeds Opfer im Kampf werd die tobende Schlacht
bloß erscht recht nacha zündn da draußen.

Und boid schewern de Fenster und wackelt dei‘ Burg,

wei‘ in Zukunft werd jetz olles anders!

Ees Muadan und Vodan weit umadum,

dagegn is ma leicht, wemma net woaß warum!

Eichre Diandln, de Buam am Familientisch,

dene werd der Kas lang scho gstunka und z‘runna!

Bleibts hint, wenn’s net mitkemmts  -  und lassts es glei bleibn,

wei‘ in Zukunft werd jetz olles anders!

Oiß geht jetz‘ sein Gang und der Kurs der is gricht: ...

der Hatscherte, der werd der Schnell‘ vo‘ der Gschicht.

Wia der heitige Tag – glei‘ scho morgn is er dahi!

Ja, so a Ordnung is fei‘ ganz schnell bei’n Deifi!

Und der Oberst‘ vo heit is der Ollerletzte am End ...

... wei‘ in Zukunft is nacha oiß anders!

As years go by  -  auf und ab geht de Sunn,
times were a-changin‘  -  kaam oaner fragt mehr warum.
Melodien und Reime - in Millionen versenkt,
Visionen - verstobn und verstunka.
Aus‘m Spiagl schaugt‘hn der Zweife‘ o‘
dahinter bleckt’hn grinsend der Deifi o‘: ...
... seine Traam - zu Utopien versunka!
Und irgendwann nacha gspannt er’s: ...
d‘Revolution – de war ganz woanders!

Ja, Revolutionen, mei‘ Liaber – dee gangadn anders!
 

KvK 23.07.2020
[orig.by Bob Dylan]